Қырғыз хрестоматиясы/Сөз басы
- Бір Құдайға сиынып,
Кел, балалар, оқылық,
Оқығанды көңілге
Ықыласпен тоқылық!
- Істің болыр қайыры
Бастасаңыз алдалап,
Оқымаған жүреді
Қараңғыны қармалап.
- Кел, балалар, оқылық,
- Оқығанды көңілге
- Ықыласпен тоқылық!
- Оқысаңыз, балалар,
Шамнан шырақ жағылар,
Тілегенің алдыңнан
Іздемей-ақ табылар.
- Кел, балалар, оқылық,
- Оқығанды көңілге
- Ықыласпен тоқылық!
- Мал дәулеттің байлығы,
Бір жұтасаң жоқ болыр,
Оқымыстың байлығы,
Күннен-күнге көп болыр,
Іш жұтамақ жоқ болыр.
- Кел, балалар, оқылық,
- Оқығанды көңілге
- Ықыласпен тоқылық!
- Сиса көйлек үстіңде
Тоқуменен табылған...
Сауысқанның тамағы
Шоқуменен табылған...
Өнер-білім бәрі де
Оқуменен табылған.
- Кел, балалар, оқылық,
- Оқығанды көңілге
- Ықыласпен тоқылық!
- Дадандықтың белгісі
Іш ақылға жарымас.
Жайылып жүрген айуандай
Ақ, қараны танымас.
Аяңшыл ат арымас,
Білім деген қарымас.
Жөн білмеген даданға Қыдыр ата дарымас.
- Кел, балалар, оқылық,
- Оқығанды көңілге
- Ықыласпен тоқылық!
- Оқу деген шыны-ды,
Тұрған сайын шыныққан...
Оқу білген адамдар
Май тамызған қылыштан...
Білмегенді білуге
Есті бала тырысқан,
Есер бала ұрысқан.
- Кел, балалар, оқылық,
- Оқығанды көңілге
- Ықыласпен тоқылық!
- Әлпештеген ата-ене
Қартаятын күн болыр.
Қартайғанда жабығып,
Мал таятын күн болыр.
Ата-енең қартайса
Тіреу болыр бұл оқу,
Қартайғанда мал тайса
Сүйеу болыр бұл оқу.
- Кел, балалар, оқылық,
- Оқығанды көңілге
- Ықыласпен тоқылық!
- Оқу білген таниды
Бір жаратқан Құдайды,
Танымаған Құдайды
Нағылғанда ұнайды...
Шырағым адам болғай деп,
Ата-енең жылайды,
Баладан қайыр болмаса,
Баланы неге сұрайды!
- Кел, балалар, оқылық,
- Оқығанды көңілге
- Ықыласпен тоқылық!
- Өнер-білім бар жұрттар
Тастан сарай салғызды;
Айшылық алыс жерлерден,
Көзіңді ашып-жұмғанша,
Жылдам қабар алғызды.
Мың шақырым жерлерге,
Аты жоқ құр арбаны
Күн жарымда барғызды.
Адамды құстай ұшырды;
Мал істейтін жұмысты
От пен суға түсірді;
Отынсыз тамақ пісірді,
Сусыздан сусын ішірді.
Теңізде жүзді балықтай,
Дүниені кезді жалықпай,
Білгендерге осылар
Бәрі-дағы анықтай,
Білмегенге танықтай;
Біз де бекер жатпалық,
Осыларға таныспай;
Ат өнері білінбес
Бәйгіге түсіп жарыспай;
Желкілдеп шыққан көк шөптей
Жаңа өспірім достарым,
Қатарың кетті-ау алысқа-ай,
Ұмтылыңыз, қалыспай!...
- Біз дадан боп өстірдік
Иектегі сақалды.
Өнер – жігіт көркі деп
Ескермедік мақалды...
Біз болмасақ сіз барсыз,
Үміт еткен достарым,
Сіздерге бердім батамды...